Farið í sleppitúr

Nú er komið sumar og ég búin að fara í tvo skemmtilega reiðtúra.
Þann 5. júní lagði hópur af stað austur í Reykholt. Fyrir flesta var þetta sleppitúrinn. Hestarnir á leið í haga eftir dvöl sína í hesthúsum á Reykjavíkursvæðinu. En fyrir mig var þetta tveggja daga reiðtúr. Þannig var að ég fór í öfuga átt með hrossin mín, ég reið austur í stað vestur en sveitin mín er fyrir vestann nánar til tekið í Eyja- og Miklaholtshrepp.
Þá er að segja frá sleppitúrnum. Á fimmtudeginum fluttum við (ég og Stebbi) hestanna okkar með kerru í Mosfellsdal, þar er nætur hólf fyrir þá á Hraðastöðum. Aðrir fara ríðandi þangað, en þarna samlagast hestarnir okkar öðrum hestum sem fara líka í ferðina.
Á föstudeginum er mæting kl.10.00 á Hraðastöðum. Í hólfi hestanna er búið til aðhald til að reka hestana í. Allir sem ætla að ríða þennan áfanga ná sér í hesta og leggja á. Þegar þessi áfangi er riðin þá má alltaf búast við að hrossin séu mjög spennt og gott að taka hesta sem komast hratt yfir.
Þennan fyrsta áfanga er riðið í Starrdal. Stebbi er trússinn okkar ásamt Jóhönnu sem ætlar að fylgja með á öðrum bíl, fleiri kom á bílum þangað. Þau er búinn að búa til aðhald fyrir okkur þegar við komum. Þarna er stoppað og fólk vætir kverkarnar með ýmsum vökva sumir fá sér eitthvað að borða líka. Eftir svona hálf tíma hvíld fara allir að ná í hesta og leggja á. Nú er riðið í Stífnisdal en þar er áð í hrörlegri rétt og við skiptum um hesta. Enginn bíll fylgir okkur þennan áfanga né kemur í þessa rétt. Næst er svo áð í Fellsenda og þar eru bílarnir komnir sem fylgja okkur. Nú er riðið í Brúsastaði en er skipt um hesta og síðasti áfanginn er svo í Skógarhóla. Þar fáum við næturhólf fyrir hrossin og einnig svefnpokapláss í Skógarhólum. Sumir komu með tjaldvagna til að gista í.
Í kvöld er svo grillað kjöt og grænmeti einnig var salat og fl. Um kvöldið skemmta allir sér mjög vel við söng, sögur og brandara.

Á laugardaginn er mæting í morgunmat um kl. 9.00 og ákveðið að leggja af stað kl.11.00 frá Skógarhólum. Við ríðum í gegnum Þjóðgarðinn á Þingvöllum með stoppi á Gjábakkavegi. Trússinn er búin að búa til aðhald fyrir okkur þarna. Við hvílum hestana smá stund en þaðan er svo riðið í Kringlu. Trússinn kemur einnig þangað og opnar rétt sem er þar til að hestamenn komist klakklaust inni í hana með reksturinn. Þennan áfanga rigndi þó nokkuð, annars var búið að vera gott veður báða dagana. Í Kringlu er gangnamanna kofi sem hægt er að fara inn þegar rignir eins og það gerði nú. En þar borðuðum við nestið okkar. Þegar lagt var á aftur var okkur sagt að í næsta stoppi biði okkar glaðningur. Trússinn okkar og annað hjálpar fólk tóku til eftir okkur þannig að allt yrði snyrtilegt þegar næsti hópur kæmi. Þessi áfangi tekur rúman klukkutíma, þetta eru moldargötur og ágæt reiðleið þar sem við stoppuðum við Þórisstaði. Bílarnir voru komnir á undan okkur og búnir að búa til aðhald. Bróðir Ragga tók á móti okkur með stórann mjólkurbrúsa fullann af alls konar guðaveigum. Þarna verður frekar langt stopp. Sumir drógust mikið aftur úr í þessum áfanga og aðrir voru í annarlegu ástandi til að geta haldið áfram ferðinni. En við biðum þar til allir skiluðu sér. Síðasti áfanginn er eftir og allir skipta um hesta. Nú er riðið í Sel en þar eiga hestarnir að fá næturhólf í nótt. Við ætlum að gista á Hótel Hvítá sem er í Laugarási. Í kvöld borðum við súpu í forrétt og lambalæri og tilheyrandi í aðalrétt. Þetta var alveg frábær ferð.
Á sunnudaginn tók ég þrjá af hestunum mínum og setti á kerru til að keyra þeim til baka í hesthúsið og lét hina tvo hlaupa áfram með þeim sem héldu áfram. Planið var svo að keyra þeim vestur daginn eftir. Hér getið þið séð nokkrar myndir frá ferðinni.

See my Tabblo>